آج ہم اس سلسلے کی چھٹی کڑی کے طور پر ایک ایسی اداکارہ کا ذکر کر رہے ہیں جو اپنے عروج کے دور میں 'نیکسٹ ڈور گرل' (Next Door Girl) کے طور پر جانی جاتی تھیں۔
عائشہ جھلکا 28 جولائی 1972 کو سری نگر، کشمیر کے ایک فوجی گھرانے میں پیدا ہوئیں۔ ان کے والد، ونگ کمانڈر اندر کمار جھلکا، انڈین ایئر فورس میں ایک اعلیٰ عہدے پر فائز تھے۔ فوجی نظم و ضبط اور اصول پسندی انہیں ورثے میں ملی، لیکن ان کا رجحان بچپن سے ہی فنِ لطیفہ کی جانب تھا۔ انہوں نے اپنے فلمی سفر کا باقاعدہ آغاز 1991 میں فلم 'قربان' سے کیا، جس میں ان کے مدمقابل سلمان خان تھے۔ اگرچہ یہ ان کی پہلی ہندی فلم تھی، لیکن ان کی حقیقی پہچان ابھی ایک بڑے شاہکار کی منتظر تھی۔
ان کی زندگی کا سب سے بڑا ٹرننگ پوائنٹ 1992 میں منصور خان کی فلم 'جو جیتا وہی سکندر' ثابت ہوئی۔ اس فلم میں 'انجلی' کا کردار نبھاتے ہوئے عائشہ نے اپنی فطری اداکاری سے سب کو حیران کر دیا۔ اگلے ہی سال ریلیز ہونے والی فلم 'کھلاڑی' نے انہیں کمرشل سینما کی ضرورت بنا دیا اور اکشے کمار کے ساتھ ان کی جوڑی کو بے حد پسند کیا گیا۔ یہ عائشہ جھلکا کی مقبولیت ہی تھی کہ اس وقت کے تمام بڑے فلم ساز انہیں اپنی فلموں کا حصہ بنانا چاہتے تھے۔
عائشہ جھلکا کے فنی کیریئر کا ایک انتہائی دلچسپ اور انوکھا واقعہ فلم 'جو جیتا وہی سکندر' کے کلائمکس کی شوٹنگ کے دوران پیش آیا۔ سائیکل ریس کے آخری مناظر کی عکس بندی کے وقت ایک حادثے میں عائشہ کے ماتھے پر گہرا زخم آیا، کیونکہ وہاں موجود ایک پول میں لگی کیل ان کے ماتھے میں دھنس گئی تھی۔ اس کے لیے انہیں فوری طور پر ٹانکے لگوانے پڑے۔ ڈاکٹروں نے انہیں مکمل آرام کا مشورہ دیا، لیکن فلم کی بروقت تکمیل اور اسٹیڈیم کی بکنگ کے مسائل کی وجہ سے انہوں نے پٹی باندھ کر اور اپنے زخم کو 'سرخ ٹوپی' (Red Cap) سے چھپا کر شوٹنگ جاری رکھی۔ آج بھی ان کے ماتھے پر موجود وہ نشان ان کی پیشہ ورانہ لگن کی گواہی دیتا ہے۔
جہاں دیگر اداکارائیں شہرت کے حصول کے لیے ہر ممکن کوشش کرتی ہیں، وہیں عائشہ جھلکا نے اپنے عروج کے وقت ایک حیران کن فیصلہ کیا۔ انہوں نے محسوس کیا کہ وہ فلمی دنیا کی مشینی زندگی سے اکتا رہی ہیں اور انہیں ایسے کردار مل رہے ہیں جہاں انہیں محض ایک 'پراپ' کے طور پر استعمال کیا جا رہا ہے۔ چنانچہ انہوں نے معیار پر سمجھوتہ کرنے کے بجائے آہستہ آہستہ فلموں سے کنارہ کشی اختیار کر لی۔ ان کی زندگی کا ایک اور متاثر کن پہلو جانوروں سے ان کی بے پناہ محبت ہے۔ وہ ایک طویل عرصے سے 'سوسائٹی فار اینیمل سیفٹی' (SAS) کی نائب صدر کی حیثیت سے جانوروں کے حقوق اور ان کی فلاح و بہبود کے لیے کام کر رہی ہیں۔
سنہ 2003 میں عائشہ جھلکا بزنس مین سمیر واشی کے ساتھ رشتہ ازدواج میں بندھ گئیں، جس کے بعد انہوں نے خود کو (Construction) اور 'انانتا' (Anantaa) اسپا بزنس کی دنیا میں کامیابی سے منوایا۔ ایک طویل وقفے کے بعد، انہوں نے حال ہی میں ویب سیریز 'ہش ہش' (Hush Hush) کے ذریعے دوبارہ اسکرین پر واپسی کی ہے۔
آپ میں سے کتنے لوگوں کو یہ اداکارہ پسند تھیں اور کون سے دوست اس پوسٹ کے بعد ان کے بارے میں جان رہے ہیں؟
(آرٹیکل کو مختصر اور قارئین کی دلچسپی برقرار رکھنے کے لیے کافی ساری باتیں لکھنے کے بعد حذف کر دی گئی ہیں۔)
(آرٹیکل کی تیاری میں وکی پیڈیا کے علاوہ ڈھیر ساری بھارتی ویب سائٹس اور فورم جیسا کہ ریڈٹ سے مدد لی گئی ہے)